Качанава: мы павінны забяспечыць нашу лекавую бяспеку

14 кастрычніка, Мінск /Кар. БЕЛТА/. Мы павінны забяспечыць нашу лекавую бяспеку, заявіла старшыня Савета Рэспублікі Наталля Качанава на выязным пасяджэнні экспертна-кансультатыўнага савета пры Прэзідыуме Савета Рэспублікі на тэму "Аб актуальных праблемах развіцця фармацэўтычнай галіны Рэспублікі Беларусь" у Нацыянальнай акадэміі навук, перадае карэспандэнт БЕЛТА. "Фармацэўтычная галіна ў цэлым у свеце развіваецца даволі эфектыўна і паспяхова ўносіць значны ўклад у развіццё кожнай краіны. Паводле ацэнак экспертаў, аб'ём сусветнага фармацэўтычнага рынку перавысіў ужо $1 трлн са штогадовым прыростам каля 8 працэнтаў. У перспектыве чакаецца, што рост сусветнага фармацэўтычнага рынку да 2030 года адносна 2017-га складзе 60 працэнтаў і больш. У нашай краіне на бягучую пяцігодку фармацэўтычная галіна вызначана адной з прарыўных кропак росту прамысловасці. Прамысловую вытворчасць лекавых прэпаратаў у Беларусі ажыццяўляюць 40 фармацэўтычных прадпрыемстваў, у галіне занята 11 тыс. чалавек. Штогод растуць аб'ёмы вытворчасці, адкрываюцца вытворчасці новых відаў лекавых прэпаратаў", - расказала Наталля Качанава. Разам з тым уплыў на развіццё фармгаліны аказала пандэмія 2020 года, а таксама санкцыйны націск, што паўплывала на зніжэнне паставак беларускіх лекавых сродкаў на знешнія рынкі, скарачэнне аб'ёмаў экспарту. "Прадпрыемствам давялося пераарыентаваць прадукцыю, што выпускаецца, на ўнутраны рынак, а таксама шукаць новыя рынкі збыту ў іншых краінах. Хоць гэта тэма для нас абсалютна не новая. Прэзідэнт краіны яшчэ намнога раней гаварыў аб неабходнасці развіцця свайго фармацэўтычнага рынку, выпуску новых фармпрэпаратаў і лекавых сродкаў. І тады ўжо была пастаўлена задача, што ў нашай краіне павінна выпускацца больш за 50 працэнтаў лекавых сродкаў айчыннай вытворчасці. Гэта лекавая бяспека. А з улікам санкцыйнага націску Прэзідэнт дакладна сказаў: мы павінны зрабіць усё, каб нашы людзі не адчулі на сабе гэтыя санкцыі, - адзначыла спікер. - Сёння нам трэба проста ведаць, дзе закупляць сыравіну, якую мы закуплялі раней на традыцыйных рынках: ва Украіне, заходніх краінах. Гэтым сёння займаюцца нашы вытворцы. Я не так даўно наведвала прадпрыемствы фармацэўтычнай галіны. Вядома, тут чакаецца работа на апярэджанне. Мы павінны маніторыць увесь рынак лекавых сродкаў і вырабляць тое, што сёння трэба нам. Акрамя таго, мы ўжо неаднаразова гаворым аб умовах рэгістрацыі нашых лекавых сродкаў. Таму, што недзе гэта часам зацягваецца неправамерна доўга. Вядома, гэта здароўе людзей і спяшацца тут ні ў якім разе нельга. Усё павінна быць праверана, пратэсціравана. Але разам з тым жыццё дыктуе нам новыя ўмовы, і мы павінны больш аператыўна рэагаваць". "Сёння мы сюды запрасілі кіраўнікоў прадпрыемстваў фармгаліны, міністра аховы здароўя, вучоных. Ад іх работы шмат у чым залежыць, якія лекавыя прэпараты трапяць заўтра ў аптэчную сетку краіны, пойдуць на экспарт у іншыя краіны. І тады ўжо цэнавы фактар адыгрывае вырашальную ролю. Напрыклад, прэпараты, якія сёння выкарыстоўваюцца для лячэння кавідінфекцыі імпартнай вытворчасці вельмі дарагія. Таму трэба распрацоўваць беларускія аналагі. Пры гэтым улічваць посткавідныя сімптомы людзей і выпускаць прэпаратаы", - дадала Наталля Качанава.