Канцэрт каля стэлы "Мінск - горад-герой" стаў маляўнічай кульмінацыяй Дня Незалежнасці

3 ліпеня, Мінск /Кар. БЕЛТА/. Гала-канцэрт "Героям-вызваліцелям - памяць на вякі!" каля стэлы "Мінск - горад-герой" стаў кульмінацыяй святочных мерапрыемстваў да Дня Незалежнасці, перадае карэспандэнт БЕЛТА. Раніцай мінчан і гасцей сталіцы здзіўляў маляўнічы парад: больш за 5 тыс. ваеннаслужачых, звыш 300 адзінак колавай і гусенічнай тэхнікі, а яшчэ выступленне лётчыкаў. Ваенныя змаглі падарыць гледачам адчуванне захаплення. Святкаванне прадаўжалася на розных пляцоўках: у раёнах горада, каля Палаца спорту, у Вялікім тэатры. Ну а кульмінацыяй дня стаў гала-канцэрт каля стэлы. Тут шмат зорак як з Беларусі, так і іншых краін. На сцэне выступілі Вікторыя Алешка, Аляксей Будзько, Андрэй Коласаў. Парадавалі гледачоў расійскі музычны калектыў "Хор Турэцкага", казахстанская рок-група Motor-Roller. Пераможца вакальнага шоу краіны "Фактар.by" Іван Дзятлаў разам з іншымі артыстамі выканаў кампазіцыю "Неба Беларусі". Ён падзяліўся, што свята адчуваецца не толькі сёння. "Здаецца, увесь месяц быў святочным. Мы адзначалі юбілеі вызвалення гарадоў Беларусі. Сёння 80 гадоў вызвалення Мінска, і мне здаецца, гэта атмасфера захаваецца яшчэ доўгі і доўгі час", - сказаў ён. "Сёння ўсё свята - гэта даніна павагі мінуламу, павагі нашым вялікім продкам, якія захавалі для нас мірнае неба. Гэта памяць, якую мы захоўваем, пра якую ўсе гавораць, яе хочацца пранесці і адчуць да канца", - дадаў Іван Дзятлаў. Юная спявачка Сафія Рустамава прыняла ўдзел у нумары "Легенды Беларусі". Яна сказала, што для яе асаблівы гонар - парадаваць гледачоў у такі дзень. "Наша песня этнічная, з ноткамі мінулага. І цікава выконваць нешта, што гаворыць не толькі пра нашу сучаснасць, але і даведацца яшчэ раз пра гісторыю нашых продкаў", - адзначыла артыстка. Яна таксама лічыць, што менавіта моладзь павінна сёння ўзяць на сябе адказнасць па захаванні гістарычнай памяці. Парадаваць беларускага гледача прыехала казахстанская рок-група Motor-Roller. Лідар групы Ільяс Аўтаў адзначыў, што Дзень Незалежнасці - гэта тое, што павінна быць у кожнай краіне. "Незалежнасць - галоўнае, што патрэбна краіне. Гэта і свая вытворчасць, і моцная духоўная аснова, і патрыятычнае выхаванне, і ўкараненне правільных традыцыйных каштоўнасцей. І ўсё гэта я бачу ў Беларусі", - сказаў ён. Ільяс Аўтаў дадаў, што ў Беларусі іх група з гастролямі. Яны паспелі ўжо выступіць у Наваполацку, сёння пакарылі адну з галоўных пляцовак краіны, а наперадзе яшчэ некалькі канцэртаў. "Мы прыязджаем у Беларусь, таму што вельмі любім вашу краіну і заўсёды атрымліваем гарачы прыём ад гледачоў", - адзначыў ён. У любові да Беларусі прызнаўся і Міхаіл Турэцкі. Разам са сваім калектывам ён выканаў песні ваенных гадоў. "Сёння мы ганарымся тым, што бачым. І гэта не толькі Мінск. Мы ў захапленні ад таго, як выглядаюць Брэст, Магілёў, Гомель і іншыя гарады. Краіна развіваецца, і сёння Беларусь - ачаг стабільнасці і ўпэўненасці ў заўтрашнім дні. Мы тут адчуваем сябе свабодна і ўпэўнена. Адчуваецца неверагодны спакой, камфорт і свабода", - сказаў Міхаіл Турэцкі. Напярэдадні салюту ўсе ўдзельнікі канцэрта разам з гледачамі праспявалі гімн.-0-