Карпенка: патрыятызм - гэта ў першую чаргу служэнне свайму народу

25 жніўня, Мінск /Кар. БЕЛТА/. Патрыятызм - больш глыбокае паняцце, гэта ў першую чаргу служэнне свайму народу, заявіў старшыня ЦВК Ігар Карпенка. Сёння ён прыняў удзел у рабоце клуба будучых выбаршчыкаў, які быў адкрыты ў пачатку лета ў Нацыянальным дзіцячым адукацыйна-аздараўленчым цэнтры "Зубраня", паведамляе карэспандэнт БЕЛТА. "Я ў патрыятызм укладваю больш глыбокае паняцце - гэта ў першую чаргу служэнне свайму народу. І тады ўсё становіцца на свае месцы. Калі ты служыш свайму народу, і нават калі не згодны з палітычным курсам, падабаецца табе хтосьці або не, ты ніколі не будзеш патрабаваць санкцый супраць свайго народа. Ты не паедзеш за мяжу і не будзеш прасіць, каб сюды закінулі нейкіх баевікоў, каб скінуць гэту ўладу, а потым глядзець, што будзе адбывацца. Мы павінны працаваць так, каб выбарчая сістэма была ўстойлівай і стварала легітымныя магчымасці фарміравання ўсіх інстытутаў улады ў інтарэсах беларускага народа", - адзначыў Ігар Карпенка. Старшыні ЦВК моладзь задала пытанне: ці варта ўводзіць у краіне адміністрацыйную адказнасць за няўдзел у выбарах па прыкладзе замежных краін. "Гэта пытанне няпростае і неадназначнае. Я, шчыра кажучы, не прыхільнік увядзення нейкіх форм адказнасці за тое, што ты не ўдзельнічаеш у выбарах. Я растлумачу чаму. Палітыка нашай незалежнай, суверэннай, сацыяльна арыентаванай дзяржавы нацэлена на тое, каб павышаць дабрабыт беларускага народа. І ўлада павінна працаваць такім чынам, каб людзі былі зацікаўлены ў падтрымцы і захаванні гэтай улады і тых сацыяльных заваёў, якія гэта ўлада ўстанавіла і рэалізуе. Калі дзяржаўная палітыка накіравана на тое, каб ствараць гэтыя ўмовы, рэалізоўваць гэтыя галоўныя падыходы, такія, як сацыяльная справядлівасць, павышэнне дабрабыту людзей, у імя людзей штосьці ствараць, будаваць, - тады не ўзнікае пытання: ісці або не ісці на выбары", - падкрэсліў Ігар Карпенка. На працягу ўсяго лета юнакі і дзяўчаты, якія адпачываюць у "Зубраняці", сустракаліся з членамі і супрацоўнікамі Цэнтрвыбаркама, што садзейнічала паляпшэнню прававой дасведчанасці будучых удзельнікаў выбарчага працэсу. Дарэчы, клуб будучых выбаршчыкаў - гэта сумесны праект Цэнтрвыбаркама і Міністэрства адукацыі, накіраваны на павышэнне прававой культуры моладзі ў галіне выбарчага права. НДЦ "Зубраня" з'яўляецца цэнтрам міжнароднага дзіцячага супрацоўніцтва, ён шырока вядомы не толькі ў Беларусі, але і за мяжой. Сваёй дзейнасцю цэнтр умацоўвае прэстыж краіны на міжнароднай арэне. За апошнія гады тут пабывалі дзеці больш як з 40 краін свету.