Лукашэнка прыляцеў у Баку. Прэзідэнты Беларусі і Азербайджана сустрэліся за нефармальнай вячэрай

13 красавіка, Баку /Кар. БЕЛТА/. Прэзідэнт Беларусі Аляксандр Лукашэнка ўвечары 13 красавіка прыбыў з візітам у Азербайджан. Самалёт беларускага лідара прызямліўся ў міжнародным аэрапорце Гейдар Аліеў, перадае карэспандэнт БЕЛТА. Бакінская паветраная гавань, названая ў гонар былога Прэзідэнта Азербайджана і агульнанацыянальнага лідара Гейдара Аліева, размясцілася за 25 кіламетраў ад сталіцы. Да прыбыцця борта нумар адзін з Беларусі тут рыхтаваліся загадзя: перад урадавым тэрміналам "Шарыф" былі ўзняты дзяржаўныя сцягі дзвюх краін, а да трапа самалёта паслалі чырвоную дарожку, уздоўж якой урачыста выстраіліся ваеннаслужачыя роты ганаровай варты. Аляксандра Лукашэнку ў аэрапорце сустракала ўрадавая дэлегацыя Азербайджана і беларускія чыноўнікі, якія прыляцелі ў Баку напярэдадні. Пасля невялікага цырыманіялу кіраўнік дзяржавы сеў у аўтамабіль і накіраваўся на сустрэчу з Прэзідэнтам Азербайджана Ільхамам Аліевым. Першая сустрэча двух лідараў арганізавана ў фармаце нефармальнай вячэры. Як паказвае практыка, часам за такімі перагаворамі ўдаецца вырашыць больш пытанняў, чым у час афіцыйных пасяджэнняў. "У нефармальнай абстаноўцы кіраўнікі дзяржаў абмяркуюць асноўныя напрамкі беларуска-азербайджанскіх адносін і стратэгічныя пытанні двухбаковага супрацоўніцтва", - паведамлялі раней у прэс-службе кіраўніка дзяржавы. Але ўсё ж традыцыйна цэнтральнай у час візітаў заўсёды з'яўляецца афіцыйная частка перагавораў. Яна запланавана на сераду. Сустрэча прэзідэнтаў пройдзе ў палацы "Загульба", які з'яўляецца часткай рэзідэнцыі азербайджанскага лідара. Яна была пабудавана яшчэ ў 2008 годзе ў аднайменным пасёлку на беразе Каспійскага мора. У савецкія гады тут размяшчаліся ўрадавыя дачы. Перагаворы кіраўнікоў дзяржаў спачатку пройдуць у вузкім складзе, у іх таксама прымуць удзел міністры замежных спраў. Затым да іх далучацца астатнія члены дэлегацый, якія будуць абмяркоўваць ужо профільныя пытанні. "Асноўная ўвага будзе ўдзелена пашырэнню гандлёва-эканамічнага ўзаемадзеяння і напаўненню супрацоўніцтва новым зместам. Бакі разгледзяць пытанні прамысловай кааперацыі, рэалізацыю бягучых і перспектыўныя праекты ў галіне вытворчасці і паставак прадуктаў харчавання, перапрацоўкі сельскагаспадарчай прадукцыі. Закрануць і не менш актуальныя тэмы: супрацоўніцтва ў ахове здароўя, навукова-тэхнічнай, адукацыйнай і турыстычнай сферах", - адзначалі ў прэс-службе Прэзідэнта Беларусі. Кіраўнікі дзяржаў таксама абмяняюцца думкамі па актуальных пытаннях міжнароднага парадку дня. Як расказаў журналістам пасол Беларусі ў Азербайджане Андрэй Раўкоў, візіт Аляксандра Лукашэнкі ў гэту краіну планаваўся яшчэ ў канцы 2020 года, але па аб'ектыўных прычынах ён не адбыўся. 21 лютага Андрэй Раўкоў уручыў даверчыя граматы Прэзідэнту Азербайджана, і бакі змаглі абмеркаваць магчымы час для правядзення візіту кіраўніка беларускай дзяржавы. Пасля прапрацоўкі гэтага пытання выбар прыпаў на красавік. У 2020 годзе тавараабарот паміж Беларуссю і Азербайджанам наблізіўся да паўмільярда долараў. Азербайджан увайшоў у топ-15 буйнейшых гандлёвых партнёраў Беларусі. Але, паводле слоў пасла, мінулы год для развіцця эканамічнага супрацоўніцтва быў складаны і напружаны. У першую чаргу з-за сітуацыі з пандэміяй. Пры гэтым беларускі экспарт у Азербайджан павялічыўся больш як на 30 таварных пазіцый. Напрыклад, добра зарэкамендавалі сябе на азербайджанскім рынку беларускія прадукты харчавання. Істотны ўклад у тавараабарот унеслі і пастаўкі паяздоў Stadler. "Таму павелічэнне экспартнага патэнцыялу паміж нашымі дзяржавамі - гэта рэальная задача, над якой трэба працаваць. Гэтай мэце прысвечаны ў тым ліку і візіт кіраўніка дзяржавы, - расказаў Андрэй Раўкоў. - Візіт на вышэйшым узроўні - гэта не толькі палітычнае пытанне. Гэта перш за ўсё наданне імпульсу адносінам паміж дзвюма краінамі і дзяржаўнаму апарату, што дасць магчымасць развіваць агульныя падыходы на карысць нашых народаў".