Навінкі і хіты беларускага харчпрама прадстаўлены на "Экспа-2020" у Дубаі

11 лістапада, Мінск /Кар. БЕЛТА/. Навінкі і хіты беларускага харчпрама былі прадстаўлены 10 лістапада, у Дзень канцэрна "Белдзяржхарчпрам", на сусветнай выстаўцы "Экспа-2020" у Дубаі, паведамілі карэспандэнту БЕЛТА ў прэс-службе канцэрна. "Высокая якасць, даступнасць і экалагічнасць - усё гэта брэнд Made in Belarus. Беларускія прадпрыемствы прадставілі навінкі і хіты айчыннай харчовай прамысловасці, а таксама эксклюзіўную прадукцыю з улікам асаблівасцей рэгіёна. Спецыяльна для спажыўцоў з Блізкага Усходу прывезлі шакаладныя цукеркі і фігуры ў форме вярблюда, чыпсы са смакам чылі і лайма, солі і воцату, какосавае малако і арэхавыя напіткі, тытунь для кальяна", - расказалі ў прэс-службе. Калектыўная экспазіцыя канцэрна аб'яднала вядучыя прадпрыемствы галіны: "Спартак", "Слодыч", "Камунарку", "Чырвоны харчавік", "Гаму смаку", Гарадзейскі цукровы камбінат, Мінскі завод пеністых він, "Мінск Крышталь", Мінскі маргарынавы завод, тытунёвую фабрыку "Нёман". "У партфелі канцэрна ўжо восем пагадненняў, выказаны значны інтарэс да нашай прадукцыі, - адзначыў намеснік старшыні канцэрна "Белдзяржхарчпрам" Аляксандр Якоўчыц. - Мы бачым, што "Экспа-2020" - гэта пляцоўка магчымасцей. Увесь свет канкурыруе тут, і мы ганарымся тым, што наша прадукцыя запатрабавана і вядома. Мы ўжо ажыццявілі першыя пастаўкі на $0,5 млн у краіны Персідскага заліва. Вялікі інтарэс бачым да кандытарскіх вырабаў, дзіцячага харчавання, рапсавага алею. Упэўнены, гэты форум дасць нам дадатковы штуршок у асваенні рынкаў краін Блізкага Усходу і Паўночнай Афрыкі". Госці беларускага павільёна змаглі азнаёміцца з харчовым патэнцыялам краіны і прадэгуставаць прадукцыю прадпрыемстваў канцэрна. "Сёння ў нас ёсць добрая магчымасць сустрэцца з вытворцамі прадуктаў харчавання з Беларусі. Мы правялі перагаворы з многімі фабрыкамі, уключаючы кандытарскія і кансервавыя. Мы спадзяёмся на добрую кааперацыі з беларускімі вытворцамі. У нас ужо ёсць паспяховы вопыт супрацоўніцтва з прадпрыемствам канцэрна, а сёння мы падпісалі новае пагадненне з яшчэ адной кандытарскай кампаніяй", - падкрэслілі ў кампаніі Bright Act Middle East. Часткай дзелавой праграмы для беларускай дэлегацыі стане візіт у даліну харчовых тэхналогій Дубая (Food Tech Valley) і перагаворы з партнёрамі з Блізкаўсходняга рэгіёна.