Парламентарыі абмеркавалі мадэльную заканатворчасць у Саюзнай дзяржаве

20 студзеня, Мінск /Кар. БЕЛТА/. Парламенцкія слуханні "Мадэльная заканатворчасць у Саюзнай дзяржаве" і пасяджэнне Камісіі Парламенцкага сходу па заканадаўстве і рэгламенце адбыліся ў фармаце відэаканферэнцыі, паведамляе карэспандэнт БЕЛТА. У парламенцкіх слуханнях прынялі ўдзел дэпутаты Парламенцкага сходу, прадстаўнікі Пастаяннага камітэта Саюзнай дзяржавы, міністэрстваў і ведамстваў Беларусі і Расіі, міжнародных арганізацый, органаў улады прыгранічных рэгіёнаў, вядучыя юрысты і эксперты ў галіне права. Абмеркавана методыка распрацоўкі і прыняцця Парламенцкім сходам мадэльных заканадаўчых актаў, вызначаны прыярытэтныя сферы мадэльнага рэгулявання, сфарміраваны план мадэльнай заканатворчасці на 2021 год і сярэднетэрміновую перспектыву. У рабоце Камісіі Парламенцкага сходу па заканадаўстве і рэгламенце прынялі ўдзел саюзныя парламентарыі, прадстаўнікі Пастаяннага камітэта Саюзнай дзяржавы, міністэрстваў і ведамстваў дзвюх краін. "Гэта вельмі важнае абмеркаванне ўзаемадзеяння для развіцця мадэльнай заканатворчасці, паколькі гэта практычная аснова для развіцця заканадаўства нашых краін для яго ўніфікацыі, - сказала старшыня Пастаяннай камісіі па заканадаўстве Палаты прадстаўнікоў Святлана Любецкая. - Беларусь сёння цвёрда стаіць на шляху лічбавізацыі эканомікі, таму любы міжнародны вопыт і станоўчыя рэкамендацыі вельмі карысныя. Калі сказаць канкрэтна, то для нашых перавозчыкаў, банкаўскай сістэмы важны вопыт суседняй дзяржавы, з якой мы выбудоўваем агульныя адносіны, каб аб'яднаць падыходы і аблягчыць трансгранічнае ўзаемадзеянне". Дэпутаты - члены Камісіі Парламенцкага сходу па заканадаўстве і рэгламенце падвялі вынікі парламенцкіх слуханняў. Прадстаўнікі Пастаяннага камітэта Саюзнай дзяржавы прадставілі дэпутатам інфармацыю аб ходзе работы над праектам канцэпцыі збліжэння заканадаўства Саюзнай дзяржавы. Разгледжаны прапановы па павышэнні эфектыўнасці работы ў парламенцкім вымярэнні, абмеркаваны актуальныя пытанні дзейнасці па забеспячэнні роўных правоў грамадзян Саюзнай дзяржавы, падведзены вынікі работы ў 2020 годзе.-0-