Румас адзначыў збалансаванасць знешняга гандлю: дадатнае сальда склала $425 млн

23 красавіка, Мінск /Аліна Грышкевіч - БЕЛТА/. Прэм'ер-міністр Беларусі Сяргей Румас звярнуў увагу на збалансаванасць знешняга гандлю краіны, выступаючы сёння на нарадзе ў Прэзідэнта аб першачарговых мерах па забеспячэнні ўстойлівай работы эканомікі і сацыяльнай сферы ва ўмовах сусветнай эпідэміялагічнай сітуацыі, перадае карэспандэнт БЕЛТА. Сяргей Румас прывёў некаторыя паказчыкі работы, у прыватнасці сказаў аб збалансаванасці знешняга гандлю: дадатнае сальда гандлю таварамі і паслугамі за два месяцы гэтага года склала $425 млн. Кіраўнік урада праінфармаваў: "Тэмп росту ВУП у першым квартале склаў 99,7 працэнта, гэта ніжэй на адзін працэнтны пункт за квартальны прагноз, але вышэй за ўсе ацэнкі - і знешнія, і ўнутраныя. Ва ўмовах пандэміі ўрад зрабіў упор на развіццё ўнутраных галін эканомікі". Паводле слоў Сяргея Румаса, станоўчы ўклад у фарміраванне ВУП унеслі будаўнічая галіна (106,3 працэнта), у тым ліку плюс па будаўніцтве жылля склаў 10 працэнтаў, сельская гаспадарка (104,5 працэнта), інфарматызацыя і сувязь (107,4 працэнта). Прэм'ер-міністр адзначыў таксама дынаміку работы галін прамысловасці на мясцовай сыравіне, металургіі, дрэваапрацоўкі, фармацэўтыкі, ёсць плюс па вытворчасці цэменту (110 працэнтаў), керамічнай пліткі (102 працэнты). "Па ўсіх астатніх сектарах таксама ёсць дадатная дынаміка. На працягу лютага і сакавіка прыбаўлялі ўсе. Акрамя, аб'ектыўна, нафтавай галіны, якая пачала прырастаць з красавіка", - заўважыў ён.