Стыпендыі Прэзідэнта Беларусі на 2023 год назначаны 64 аспірантам

12 студзеня, Мінск /Кар. БЕЛТА/. Стыпендыі Прэзідэнта Рэспублікі Беларусь на 2023 год назначаны 64 аспірантам, якія выконваюць дысертацыйныя даследаванні па прыярытэтных напрамках навуковай, навукова-тэхнічнай і інавацыйнай дзейнасці ва ўстановах адукацыі і навуковых арганізацыях. Гэта прадугледжана распараджэннем, якое падпісаў кіраўнік дзяржавы Аляксандр Лукашэнка 12 студзеня, паведамілі БЕЛТА ў прэс-службе беларускага лідара. Навуковыя дасягненні стыпендыятаў маюць важнае значэнне для грамадства і дзяржавы. Іх паспяховыя распрацоўкі ў галіне тэхнічных, фізіка-матэматычных, хімічных, медыцынскіх, сельскагаспадарчых, эканамічных, педагагічных навук, мастацтвазнаўства, спорту, навук аб Зямлі актуальныя і запатрабаваныя. Вынікі іх работ укаранёны ў вучэбную і практычную дзейнасць арганізацый прамысловасці, медыцыны, сельскай гаспадаркі, адукацыі. Яны прадстаўлены на рэспубліканскіх і міжнародных канферэнцыях, апублікаваны ў навуковых выданнях. Распараджэнне прынята ў мэтах падтрымкі навуковых распрацовак таленавітых аспірантаў, прыцягнення ў навуку адоранай моладзі, стымулявання падрыхтоўкі навуковых работнікаў вышэйшай кваліфікацыі, развіцця айчынных навуковых школ.