ЦТ даказала сваю эфектыўнасць і павінна быць захавана - Карпенка

24 жніўня, Мінск /Кар. БЕЛТА/. Цэнтралізаванае тэсціраванне павінна быць захавана, паколькі даказала сваю эфектыўнасць і станоўча ўспрымаецца грамадствам, заявіў сёння ў час пленарнага пасяджэння Рэспубліканскага педагагічнага савета міністр адукацыі Ігар Карпенка, перадае карэспандэнт БЕЛТА. "Выконваючы даручэнне Прэзідэнта аб неабходнасці за тэстамі бачыць абітурыента, а таксама забяспечваць кадрамі перш за ўсё нацыянальную эканоміку, змяншаць адток моладзі на вучобу за мяжу, прапануем істотна пашырыць магчымасці мэтавай падрыхтоўкі спецыялістаў як формы дзяржаўнага заказу. Для гэтага ў праекце Кодэкса аб адукацыі прадугледжана ўжо зняцце тэрытарыяльных абмежаванняў на месцазнаходжанне заказчыка мэтавай падрыхтоўкі", - расказаў Ігар Карпенка. Плануецца правядзенне ў ВНУ ўнутранага ўступнага іспыту па профільным прадмеце пры адборы на мэтавую падрыхтоўку, а таксама на шэраг асобных спецыяльнасцей з улікам сярэдняга бала атэстата і абавязковай наяўнасці рэкамендацыі педагагічнага савета ўстановы адукацыі або працоўнага калектыву. "Пры гэтым захаваюцца традыцыйныя ўнутраныя ўступныя іспыты на творчыя спецыяльнасці, сельскагаспадарчыя, фізкультуры і спорту і іншыя, а таксама на скарочаную форму навучання для выпускнікоў каледжаў. Плануем прадастаўленне льгот пры паступленні ў ВНУ як пераможцам, так і ўдзельнікам заключнага этапу рэспубліканскай алімпіяды па вучэбных прадметах", - адзначыў міністр. Для адбору найбольш падрыхтаваных абітурыентаў прапануецца праводзіць унутрыўніверсітэцкія алімпіяды ў вядучых універсітэтах, пераможцы якіх будуць таксама паступаць на льготных умовах. Гэту прапанову падтрымліваюць больш за 80 працэнтаў апытаных настаўнікаў, вучняў і бацькоў. "Такія падыходы неабходна распаўсюдзіць і на тых, хто паспяхова завяршыў навучанне ў Нацыянальным дзіцячым тэхнапарку і атрымаў рэкамендацыю наглядальнага савета гэтай установы, - дапоўніў Ігар Карпенка. - Прапануецца праводзіць залічэнне ва ўстановы сярэдняй спецыяльнай адукацыі па выніках конкурсу сярэдняга бала дакумента аб адукацыі без правядзення цэнтралізаванага тэсціравання". Усе гэтыя прапановы замацаваны ў праекце ўказа Прэзідэнта, што датычыцца правіл паступлення ў ВНУ і ССНУ. "Дакумент падрыхтаваны і ў выпадку падтрымкі выкладзеных падыходаў у самы кароткі тэрмін будзе дапрацаваны і ўнесены на разгляд кіраўніку дзяржавы", - канстатаваў міністр.