Вальфовіч адзначыў ролю пажарнай службы ў аператыўным рэагаванні на тэхнагенныя і прыродныя пагрозы

25 ліпеня, Мінск /Кар. БЕЛТА/. Дзяржаўны сакратар Савета бяспекі Рэспублікі Беларусь Аляксандр Вальфовіч 25 ліпеня прыняў удзел ва ўрачыстых мерапрыемствах, прымеркаваных да Дня пажарнай службы, якія прайшлі ў беларускай сталіцы, перадае карэспандэнт БЕЛТА. Падчас свята ва Універсітэце грамадзянскай абароны МНС Беларусі адбылося прынясенне прысягі работнікамі Мінскага гарнізона, а таксама ўзнагароджванне дзяржаўнымі ўзнагародамі супрацоўнікаў ведамства. У сваім выступленні перад прысутнымі дзяржсакратар Савета бяспекі адзначыў ролю пажарнай службы ў аператыўным рэагаванні на ўзнікшыя пагрозы тэхнагеннага і прыроднага характару, яе здольнасць на высокім узроўні вырашаць пастаўленыя задачы. "Беларускія ратавальнікі-пажарныя дастойна выконваюць ускладзеныя на іх абавязкі, праяўляючы пры гэтым мужнасць, самаадданасць і высокі прафесіяналізм, - падкрэсліў Аляксандр Вальфовіч. - Сёння мы можам смела сцвярджаць, што наша служба выратавання ні ў чым не ўступае аналагічным экстранным службам іншых краін ні па ўзроўні падрыхтоўкі, ні па аснашчэнні, а па асобных напрамках нават перасягае іх". Аляксандр Вальфовіч павіншаваў работнікаў і ветэранаў органаў і падраздзяленняў па надзвычайных сітуацыях Рэспублікі Беларусь з прафесійным святам. Акрамя таго, дзяржсакратар сумесна з кіраўніцтвам Міністэрства па надзвычайных сітуацыях усклаў кветкі да помніка работнікам МНС, якія загінулі пры выкананні службовага абавязку.